Номын тухай

Маркетинг бол хэрэглэгчийн эрхэмлэлийг ашиг болгон хувиргах шинжлэх ухаан гэдгийг бид бүхэн хэдийн мэдэх болсон билээ.

Харин ямар арга замаар, яаж гэсэн асуултанд хариулахдаа энэ өрген хүрээтэй шинжлэх ухааны ойлголт бүрийг олон талаас нь авч үзэж, салбар бүрийн онцлогт тохируулан нарийвчлан судлах шаардлагатай гэдэгт эрхэм уншигч Та эргэлзэхгүй биз.

Манай улсын эрдэмтэд, судлаачид, шилдэг маркетеруудын боловсруулсан болон орчуулсан маркетингийн чиглэлийн хэд хэдэн сурах бичиг, ном, товхимол монгол хэлнээ хэвлэгдэн гарч нийтийн хүртээл болжээ.

Монголын Үндэсний Худалдаа Аж Үйлдвэрийн танхимаас эрхлэн гаргаж буй “Маркетинг” хэмээх энэхүү ном нь үйл ажиллагааны төрөл бүрийн салбарт, тухайлбал, жижиглэнгийн худалдаа, нийтийн хоол, банк, реклам, зар сурталчилгаа, экспортын хүрээнд маркетингийн арга хэрэгслүүдийг хэрхэн ашиглах талаар уншигч Танд иж бүрэн, цэгцтэй ойлголт өгөх, мөн түүнчлэн тухайн үеийн тодорхой нөхцөл байдлыг үнэлэн дүгнэж шийдвэр гаргах, түүнийгээ хэрэгжүүлэхэд практик дадлага болох бодит жишээнүүдийг өргөн тусгаж өгснөөрөө их, дээд сургууль, коллежийн оюутан, бие даан суралцагсад, нийт бизнес эрхлэгчид Та бүхэнд практик мэдлэг, үйл ажиллагааны удирдамж, шинэ санаа, чиглэл өгөх чухал ач холбогдол бүхий ширээний ном тань болно гэдэгт гүнээ итгэлтэй байна.