Монгол Улсын Үндсэн хууль батлагдсан, Үндсэн хуулийн цэц байгуулагдсаны 25 жилийн ой тохиолдуулан "Үндсэн хуулийн хэрэгжилт, хяналт, судалгаа" хэмээх энэхүү бүтээлийг туурвих үүргийг надад Үндсэн хуулийн цэцийн дарга, академич, гавьяат хуульч Ж.Амарсанаа өгсөн юм.

Энэхүү үүрэг надад ахадсан болохыг учирлаж, хэсэг хугацаанд цааргалж хойш суусан боловч үзээд алдах зарим үндэслэл байж болохыг үгүйсгэх аргагүй байлаа. Хамгийн гол нь миний бие 1990 оны гуравдугаар сараас эхлээд өдийг хүртэл БНМАУ-ын 1960 оны Үндсэн хуулийн зарим заалтыг хүчингүй болгохоос эхлээд "Үндсэн хуулийн нэмэлтийн тухай хуулийг боловсруулах, батлуулах" ажлыг тэргүүлэн зохион байгуулсан юм.