Номын тухай

 "Үг бидэн" нэртэй найруулал бий. Үг миний хувьд юу болох. Үг намайг орчлон хорвоо бас бус юутай холбодог тухайтад найруулал юм л даа. Одоо боджээ суухад нэгэн зүйл түүнд дурдахаа мартаж. Манай дээд удамд нэг бузгай хэлэмгий  хүн байсан тухай өвөө |ээжийн аав| маань хуучилдаг сан. Аавын эмээгийн төрсөн дүү тэрбээр "Үг ирвэл би мэдье. Үйл ирвэл чи мэд" гэж цээжээ хаян ханхалздаг байсан гэдэг. Үгтэй холбоотой юм бол надад даатгачих л гэсэн үг юм уу даа. Тэгэхээр хүн ер нь үхэж үгүйрлээ ч хүсэл мөрөөдөл, авъяас билиг, бодол сэтгэл нь үр хойчисд нь дамжин хадгалагдаж үүрд мөнх оршдог юм шиг ээ. Урьдын тийм ерөөлтэй учир л үзэг шүүрч үгтэй ноцолдож яваа юм байлгүй дээ хэмээн муйхарлан "өчигдөр" үгүй бол "өнөөдөр" үгүй юм даа хэмээн урьдын бүхэндээ талархаж, ерөөл одуулж сууна даа.