Номын тухай

 

Нөхөн үржихүйн эрүүл мэнд гэдэг нь хүний нөхөн үржихүйн эрхтэн тогтолцоо эрүүл байх төдийгүй хүн бие бялдар, оюун санаа нийгмийн талаар бүрэн төгс эрүүл байх тухай цогц ойлголт билээ. Энэхүү номондоо нөхөн үржихүйн эрүүл мэндийн нэг хэсэг болох эсэн мэнд амаржихуйн түгээмэл тохиолддог, эцэг эхчүүд анхаарвал зохих асуудлуудыг оруулахыг зорилоо.

Жирэмслэлт, төрөлт, төрсний дараах үед эхийн болон урагийн бие махбодод ямар өөрчлөлт гардаг, энэ үеүдэд голчлон тохиолддог эмгэгүүд, тэдгээрийг хэрхэн таньж илрүүлэх, яаж урьдчилан сэргийлэх талаар та бүхэнд мэдлэг өгнө.

Хамгийн гол нь та бүхэнд хүргэх энэ мэдээллийг оюун ухаандаа хурааж төрөх хүүхэд, төрсөн эх, шинэхэн гэр бүлийн ширээний ном байгаасай гэж хүсч байна. Номыг бэлтгэхэд цаг зав, эрдэм мэдлэг, хөрөнгө мөнгөөр туслалцаа үзүүлж, олны хүртээл болгох боломжийг олгосон найз нөхөд, гэр бүлийнхэндээ, баярласнаа илэрхийлье.

Та бүхэнд эрүүл энх төрж, үр хүүхдээ эсэн мэнд бойжуулахыг хүсч, монголын үрс болтугай гэж ерөөе. Эрүүл гэр бүлээс эруүл хүүхэд төрнө.

Их эмч Самбуу овогтой Оюунцэцэг