Номын тухай

Хүн төрөлхтнийг уяраасан их хайрын бэлгэ тэмдэг Таж Махал хийгээд Шах Жахан хаан, Мумтаз Махал хатан хоёрын тухай монголчууд эртнээс мэддэг төдийгүй утга зохиолдоо ямар нэгэн хэмжээгээр тусгаж иржээ. Гэвч томоохон хэмжээний роман бичигдсэн нь үгүй. Өдгөө зохиолч С.Батжаргалын бичсэн "Их хайрын түүх" романаас та сэтгэл догдлуулсан хайрын амт, басхүү шаналгасан гашуун тавилан, бахархал бүхнийг унших болно. Таж Махал хэмээх энэ гайхамшигт эрдэнэс болсон цасан цагаан сүм-бунхан: "Ер бусын тийм хайр хүний зүрх сэтгэлд үнэхээр оршин байсан юм шүү" гэдгийг батлан тунхаглаж, дорнын тэргэл саран дор сүүн өнгөөр үлгэр хүүрнэн буй. Хүн төрөлхтний түүхэнд ийм тод улс мөр, түүхэн том дурсгал үлдээсэн хайр өөр үгүй билээ.