Номын тухай

• Энэхүү гарын авлагыг эмхэтгэн гаргагч Б.Оюунцэцэг нь төрийн захиргааны албанд ажиллах хугацаандаа 1998 оноос эхлэн Төрийн албаны мэргэшлийн шалгалтын болон төрийн албаны удирдах албан тушаалтны сонгон шалгаруулалтын комисст тасралтгүй 16 жил томилогдон ажиллаж, төрийн албаны мэргэшлийн шалгалтанд бэлтгэгчдэд хууль зүйн зөвлөгөө, лавлагаа өгч ажиллаж ирсэн туршлагадаа үндэслэн төрийн жинхэнэ албаны мэргэшлийн шалгалтын гол шалгалт болох сорилын болон ярилцлагын шалгалтын үндэслэл болох төрийн бодлого, төрийн албатай холбогдох хууль тогтоомжуудыг бүрэн эхээр нь эмхтгэн гаргасан байна. Төрийн жинхэнэ албаны мэргэшлийн шалгалтын сорилын шалгалт нь хууль эрхзүйн мэдлэг болон ерөнхий мэдлэг, логик сэтгэлгээний асуултуудаас бүрддэг бөгөөд монгол хэлний зөв бичих дүрмийн сэдвээр сорилын шалгалт авахаас гадна ярилцлагын шалгалт, албан хэрэг хөтлөх болон компьютер ашиглах ур чадварыг шалгадаг. Уг шалгалтанд бэлтгэгчид нь тус шалгалтанд бэлтгэх сорилын ном товхимолоос гадна төрийн албатай холбогдох хууль тогтоомжуудыг бүрэн эхээр нь уншин судалж бэлтгэвэл төрийн албаны талаар илүү уялдаа холбоо, логик дараалалтай, дэлгэрэнгүй мэдээлэлтэй болж, тодорхой, гүн бат мэдлэгийг эзэмших ач холбогдолтой юм.