Номын тухай

Орчин цагт монгол хүн бүр үндэсний дээл хувцсаа зөвхөн уламжлалт баяр ёслолын үеэр төдийгүй өдөр тутамд өмсөх сонирхол, хандлагатай болсон. Ялангуяа залуучууд үндэсний хувцасны элемент агуулсан өдөр тутмын хувцсаар гоёх сонирхолтой болжээ. Иймээс орчин үеийн хүмүүсийн амьдралын хэв маяг, хэрэгцээ шаардлагад нийцсэн, биед эвтэйхэн, биеийн хэлбэр, галбирыг улам сайхан харагдуулах үүднээс үндэсний дээл хувцсыг уламжлалт болон орчин үеийн арга, технологийг хослуулан эсгэж, оёж, чимэглэн хэрэглэж байна.
Энэ номонд хувцасны зохион бүтээлт, загварчилгааг энгийн ойлгомжтой зураг дүрслэл, алхамчилсан заавар загварчилгааны тайлбартайгаар боловсруулсан бөгөөд хувцасны загвар, дизайны чиглэлээр суралцаж буй оюутнууд, энэ салбарын мэргэжилтнүүд болох эсгүүрчид, зохион бүтээгчид хэрэглэх боломжтой.
Уг номноос монгол үндэсний хэв загвартай төрөл бүрийн хувцаснууд, тухайлбал, гоёлын даашинз, дан дээл, цамц, хүрэм, хантааз, юбканы эсгүүр гаргах болон төрөл бүрийн хэлбэр загвартай зах, ханцуй, энгэр, хормойг загварчлах аргуудаас суралцах болно.