Номын тухай

Дэлхийн Оюуны өмчийн Байгууллагаас зохион байгуулсан мэргэжил дээшлүүлэх дамжаанд суралцах хугацааны нэг хэсэгт "Их" Энэтхэг улсын Патент, Барааны тэмдгийн газар дадлага хийж Бомбей хотод байх үедээ нүдээр үзсэнээ, бас олон янзын номноос уншиж, хүмүүсийн амнаас сонссон зүйлийнхээ заримаас тоож сонирхох уншигч түмнийхээ сонорыг мялаая.

Өмнөд Азийн 3,3 сая шоо дөрвөлжин километр уудам их газар нутагтай, 108 үндэстэн ястнаас бүрдсэн тэрбум давсан хүн амтай, үхэр, ямаа, хониныхоо тоогоороо дэлхийн малын хориод хувийг эзэлдэг буюу 200 гаруй сая малтай, ургамлын тос, цай, элсэн чихрээр дэлхийд тэргүүлж цагаан будаа, цөцгийн тос, тамхи, сүү, буудай, хөвөн, төмөр цемент үйлдэрлэлээр айргийн тавд багтаж эрчим хүч үйлдвэрлэлээр толгой цохих эхний арван орны тоонд орохын зэрэгцээ унадаг дугуй, автобус, галт тэрэгнээс эхлээд үйлдвэрийн янз бүрийн тоног төхөөрөмж, электрон хэрэгсэл, нисдэг тэрэг, хиймэл дагуул, сансрын пуужин хүртэл хийдэг энэ гүрнийг "Их" гэж томруулахад хэл хальтарч хэт дөвийлгөсний бурууг үүрэхийн зовлон ийгээс нэг тойрох болов уу. Монгол, Энэтхэг хоёр улс өнө эртнээс эдүгээ хүртэл түүх шастирын бат бөх учгаар холбогдсон ажгуу.