Номын тухай

Бид монгол түмний олон мянган жилийн туршид бодит амьдралаар шалгагдан шилэгдэж, ур ухаан, арга дүйгээр баяжин, уламжлагдан хөгжиж ирсэн хоол хүнс, идээ ундаагаа бэлтгэх, хэрэглэх агуу их соёлыг судлан таньж мэдсэн мэдлэг, туршлага хуримтлалын их өвийн өчүүхэн ч болов хэсгийг хойч үеийнхэндээ залгамжлуулан үлдээхийг зорьсон үнэнхүү чин сэтгэл, хүслээр Уламжлалт монгол хоолны 99 эхний дэвтрийг гаргасан билээ. Эрхэм уншигч та бүхэнд ойлгомжтой, туршин үзэж, гэр бүлийн хоолны цэсээ баяжуулахад тус хүргэх үүднээс "Уламжлалт Монгол хоолны 99 жор" номд орсон хоол тус бүрд таваглах хэмжээ, боловсруулах хугацаа, ажиллагааны хүнд хөнгөнийг нарийвчлан оруулж, тэр болгон бидний мэддэггүй нүүрс, усны илчлэгийн хэмжээг тооцоолон гаргаж, тэмдэглэгээ хийснийг анхаараарай. Ухаант ард түмний өв соёл, уудлах тусам улам ховор эрдэнэ, уламжлалт хоолны арвин баялаг сангаас дээжлэн хүргэж буй энэхүү ном та бүхний мэдлэг оюунд дусал нэмж, хооллох урлагт тань чимэг болох болтугай.