Номын тухай

...Гэнэнд өнөөдөр таагүй явдал тохиолдов. Эхлээд тэр ангийн охин Оюуны хамт захирлын өрөөнд дуудагджээ. Багш энэ тухай цэлмэг тэнгэрт аянга ниргэх адил гэнэт хэлсэн агаад өөрийнх нь хэлснээр золгүй амьтдыг ангиас дагуулаад гарахдаа уйлах нь уу гэмээр ам нь татваганаж, "уран зохиолын хичээл дээр унасан улс одоо яахав" гэж амандаа бувтнасан байна. Багшийн байдал нэг жигтэй, гурван давхрын урт хонгилоор өнгөрч, доод давхар руу уруудахдаа зөрөөд өнгөрсөн хоёр багшийг мэндлэхэд огт хариулсангүй, өөрөө хэрэг хийсэн юм шиг гунигтайгаар тонгойн явлаа. Гэрэл өмнө нь үг дуугарч үзээгүй охин руу нүднийхээ булангаар харав. ..