Номын тухай

Хар ногоон өнгөт жодоо, гацуураар өвч хучигдсан, элгэн улаан хадтай уулын цавчим өндөр оргил, хавар цагийн ногооны буданд униартана. Алсад дуниарагч тэрхүү уулнаас эх авсан гол, горхи улирлын дулаанд дахин амьсгалж зүг бүхнээ салаалан шуугих ажээ. Жигүүртэн шувууд урин дулаанд баярлан баясаж, шинэхэн нахиалсан моддын мөчирт сууж, шулганан жиргэсэн ерийн нэгэн өдөр. Ноён ууланд амьдрагч өлөгчин чоно сэргэр хадан дээр гунигтайгаар гиншин улих нь сонсогдоно. Өлөгчин чоныг гөрөөлж явахад бэлтрэгнүүд нь алга болжээ. Өлөгчин чоно оцойн сууж, дөрвөн зүг найман зовхисыг ажиглан гиншиж, бүхэл өдрийг барж нар жаргахыг хүлээв...