Номын тухай

"Номонд Шимтэгчдийн Холбоо" ТББ-аас зохион явуулдаг олон ажлын нэг нь эрдэмтэн, зохиолчдыг уншигчидтай уулзуулж тэдний амьдралд ном хэрхэн нөлөөлсөн, багаасаа тэд номтой хэрхэн нөхөрлөж, шимтсэн, номноос юу олсон, номын ачаар тэд амьдралд хэрхэн хөлөө олсон тухай яриа өрнүүлдэг. Сүүлийн нэг жил олон тооны уулзалт зохиосны дотор Монголдоо төдийгүй дэлхийд үнэлэгдсэн зохиолчидтойгоо хүүхэд, залуусаа уулзуулсан бөгөөд цуврал уулзалтын нэр "Номын жор" хэмээх нийтлэг нэг нэрийн дор зохиогддог байна. Энэ удаад янз бүрийн ажил, мэргэжлийн хүмүүсийн ярьсан яриаг бус "Номын жор" уулзалтанд зочилсон зохиолчдын яриа хөөрөөг оруулжээ. Зохиолчдын дунд өдгөө ер хол гарсан ч уншиж, бүтээж, туурвиж яваа Ардын уран зохиолч Б.Бааст гуайгаас эхлээд Т.Галсан, П.Бадарч, Д.Цоодол, Ш.Сүрэнжав, Төрийн шагналт Ш.Дулмаа, Соёлын Гавьяат зүтгэлтэн Д.Батбаяр, Д.Гармаа, Д.Нямаа гээд олны дотны танил эрхэм сайхан хүмүүсийн үнэт үгс орсон болно.