Номын тухай

Өвөрмөц хэлц, хэллэгүүд нь тухайн ард түмний уламжлалт аж төрөх ёс, зан заншил, шашин мөргөл, үндэсний сэтгэлгээний онцлогоос шалтгаалан хэл тус бүрт өөр өөр шинжтэй байдаг. Тухайн нэгэн ард түмний хэл, сэтгэлгээний бодит толь болсон өвөрмөц хэлц, хэллэгүүдийг нөгөө хэлэнд шууд үгчлэн буулгах боломж маш бага, харин тэдгээрийн адил төстэй утга санаа илэрхийлсэн өөр хэлц, хэллэгээр дүйлгэн буулгах нь илүү тохиромжтой байдаг. Манай нэрт сэтгүүлч Ц.Дашдондов монгол хэлний өвөрмөц хэлц, хэвшмэл үгсийг англи хэлний тохирох хувилбаруудтай дүйлгэн зэрэгцүүлсэн сонирхолтой судалгааг хийсний үр дүнд энэхүү толийг эмхтгэн боловсруулсан байна. Уг толь бичиг нь англи хэл сурч байгаа монгол хүн, монгол хэл сурч байгаа гадаадыханд үнэтэй чухал гарын авлага болох төдийгүй, тус хоёр орны ахуй амьдрал, зан заншил, хэл соёл, сэтгэхүйн онцлогийг танин мэдэхэд нэн тустай бүтээл болжээ.