Номын тухай

Яагаад хамгийн ухаалаг, ажил үйлс нь өөдрөг яваа сэтгэл татам бүсгүйчүүд хүртэл эрчүүдийн хийж буй үйлдлүүдийг тэр бүр ойлгодоггүй, тэдний хувийн амьдрал нь бүтэл муутай байдаг вэ? Номын зохиогч, хүмүүсийн харьцааны талаарх Америкт маш алдартай радио нэвтрүүлгийн хөтлөгч Стив Харвигийн бодлоор бол бүсгүйчүүд эдгээр асуудлын учрыг олохоор өөр бусад эмэгтэйчүүдээсээ зөвлөгөө авахаар ханддагт л бүх учир оршиж байгаа юм байна. Жинхэнэ эр хүнийг хэрхэн олж, яаж өөрөөсөө холдуулахгүй байхыг эрчүүд л илүүтэй мэднэ шүү дээ.
Стив Харви энэ номоороо маш олон эмзэг асуудлуудын талаарх эрчүүдийн бодол сэтгэлийг ойлгох сайхан боломжийг танд олгож байна.
Жишээ нь: «Та өөрийн эр хүнээс чухам юуг шаардан хүлээж болох, юуг шаардаж болохгүй вэ?», «Ээжийн эрх бандийг яаж таних вэ, тэдэнтэй хэрхэн учраа ололцох вэ?», «Найз эрэгтэйгээ өөрийн хүүхдүүдтэй хэзээ танилцуулах вэ?», «Эр хүний чухам үнэн сэтгэлийг танихын тулд түүнд ямар таван асуултыг тавих хэрэгтэй вэ?» гэх мэт олон зүйлийг та энэ номоос олж мэдэх болно. Эр хүн бүсгүйчүүдтэй тогтоосон дотно харилцааныхаа талаар хэрэг дээрээ ямар бодол сэтгэлдээ тээж явдаг болохыг та мэдмээр байгаа бол хөгжилтэй, заримдаа шууд хатуухан хэлсэн ч үргэлж үнэнийг өгүүлсэн энэхүү номыг уншаарай.