Номын тухай

СУИС-ийн Театрын урлагийн сургуулийн кино, драмын жүжигчин, найруулагч, театр судлаач, кино жүжгийн зохиолч, театрын зураач мэргэжлээр суралцаж буй оюутнуудад дэлхийн сонгодог жүжгийн зохиолыг монгол хэлээр уншиж судлах, курсын болон дипломын жүжиг хийх, уран бүтээл туурвихад сонгодог жүжгийн зохиолын сонголт хэт хязгаарлагдмал байдаг учир цөөн тооны улиг болсон хэдхэн зохиолын хүрээнд эргэлдэж байна. Үүнийг гэтлэх, тайз дэлгэцийн мэргэжлийн урлагийн сургалтын орчныг бүрдүүлэх, ном, сурах бичиг, гарын авлагаар хангахад "Бүх үеийн сонгодог жүжгүүд" эмхэтгэл ихээхэн үүрэг гүйцэтгэнэ. Уг эмхэтгэлд Софокл "Эдип хаан", Аристофан "Лисистрата", Уильям Шекспир "Шуурга", Жан Батист Мольер "Тартюф", "Жүрдэний хэнээрхэл", Карло Гольдони "Хоёр эзний ганц зарц", "Буудлын авхай", Фридрих Шиллер "Хар санаа, хайр сэтгэл", Пьер Огюстен Карон де Бомарше "Гэмт эх", Александр Грибоедов "Ухаантайн зовлон", Михайл Лермонтов "Багт наадам", Николай Гоголь "Байцаагч түшмэл", Генрих Ибсен "Нора", "Нийгмийн дайсан", Антон Чехов "Интоорын цэцэрлэг", Южин О'Нил "Тамын дурлал", Ноэл Коуард "Хувийн амьдрал", Теннесси Уильямс "Хүслийн трамвай", Алексей Арбузов "Эрхүүгийн түүх", Александр Володин "Хайртаа битгий мартаарай" гэсэн нийт 20 сонгодог жүжгийн зохиол багтжээ.