Номын тухай

Философийн толь бичигт метагалактик, мета ёс зүй, металогик, метаматематик, метафизик гэсэн олон ухагдахуунуудын тухай өгүүлсэн буй. Мета гэдэг үгийн ерөнхий утга нь цаана, дараа, далд утга зэрэг олон санааг илэрхийлнэ. Метафизикийг Аристотель анхны философи гэж нэрлээд мэдрэлийн эрхтэнээр мэдэрч чадахгүй харин хийсвэр сэтгэлгээгээр ойлгож болох юмсын хувиршгүй мөнхийн эх сурвалж гэж үзсэн бол, Ф.Гегель диалектикийн эсрэг гэсэн утгаар хэрэглэж байжээ. Метафизик нь үзэгдэл юмсын физик чанараас ухаарах, бясалгах замаар үнэнийг танин мэдэх ухаан болсныг философийн толь бичигт тайлбарласан байдаг. Харин Буддын гүн ухаанд "Илт онохын аймаг", "Илт номын сав" хэмээгээд чинад ертөнцийн нууцыг тайлахуйн арга гэж үзсэн буй. Уран зохиол судлаач Т.Батсуурийн "МЕТА УТГА" гэдэг номыг уран зохиолын чинад утгыг тайлсан тайлал гэж ухаарч болмоор.