Номын тухай

Монгол улсын түүхнээ Халхын хэцүү То ван хэмээн алдаршсан Бат-Очирын Тогтохтөрийн сурган хүмүүжүүлэх ухааны онцлог нь хүүхэд багачуудыг хэлд орох цагаас нь эрдэм номд чиглүүлэн, хөлд орох үеэс нь ажил хөдөлмөр, амьдрах ухааны дөртэй болгохын зэрэгцээ ёс журамд нэгэн зэрэг сурган хүмүүжүүлдэг байсанд оршино. Хүүхдийг хүмүүжүүлэхдээ ардын аман зохиол судлуулах, зүйр цэцэн үг цээжлүүлэх, ахмад настныг хүндлэх ёс журамд сургаж байжээ. Ийнхүү уг номын зохиогч Б.Палам То вангийн хошууны уугуул хүмүүстэй ярилцаж байхдаа тэдний ярианд өргөн хэрэглэгдэж буй зүйр, цэцэн үгийг тогтоож, тэмдэглэж авснаа эмхэтгэн "Цэцэн сургаал үг" нэртэйгээр хэвлүүлжээ.