Номын тухай

Монгол орон Манж Чин улсын эрхшээлд орсон цагаас¹ хойш Монголын ард түмэн үндэсний эрх чөлөө, тусгаар тогтнолынхоо төлөө удаа дараа эрэлхгээр босон тэмцэж ирсэн билээ. Энэхүү тэмцлийн оргил нь цагаагчин гахай жилийн² хувьсгал байсан юм. Энэ тэмцлийн үр дүнд Манж Чин улсын захиргааг хамгаас түрүүнд Ар Монголд түлхэн унагаж, төрийнхөө тусгаар тогтнолыг сэргээн тунхагласан билээ. Төрийн тусгаар тогтнолоо сэргээн бадрааж, үндэсний нэгдлээ сэргээхийн төлөө түмэн газрыгхол гэлгүй, төрсөн биеэ хайран гэлгүй тулалдаж Монгол улсынхаа төрөөс эрхэм цол, шагнал хүртэн үнэлэгдсэн эх орончид, баатар эрс энэ үед олноор төрсөн юм.

Улс орноо олон жилийн бөглүү байдлаас гаргаж, хөгжлийн хоцрогдлыг нь арилгахын төлөө санаа талбиун эрдэм ухаанаа эрхт төрдөө сэтгэл хоёрдолгүй өргөсөн төрийн эр, судрын хүмүүн олон байсан билээ. Монголын төр тэдгээр хүмүүсийг зохих ёсоор үнэлэн хэргэм, зэрэг, цол өргөмжлөн, гавьяа шагналд нь зохих ямба эдлүүлж байжээ. Энэ нь тэдний итгэл, зүтгэлийг тухайн нийгэм, цаг үе нь дүн тавьсан үнэлгээ болон түүх цадигт тэмдэглэгдэн үлджээ.

Манай Монгол улс манж Дайчин улсын эзэрхийллээс ангижирч, тусгаар тогтносон улс болсны бэлэг тэмдгийн нэг болох гавьяаны одон Эрдэнийн очир одонг зохиож, Монгол төрийн төлөө зүтгэсэн гадаадын хүмүүст олгох болсон юм.