Номын тухай

"Англи хэлний үйл үгийн хорин зургаан цаг" номоо англи хэлний мэдлэгээ дээшлүүлэе, англи хэлээр алдаагүй ярьж бичиж сурая гэсэн хүн бүрт зориулан гаргав. Хэл сурах гэж мэргэжлийн их дээд сургуульд суралцаж төгссөн хэрнээ цээжилсэн үгсээ буруу зөв холбож, юу хэлэх гээд байгаа санаагаа хүнд ойлгуулж чадахгүй хүмүүс бидний дунд цөөнгүй байдаг. Гадаадад олон жил амьдарч, хэдэн хэлийг орчинд нь сурч яваа туршлага дээрээ үндэслэн хэлэхэд хэлийг үг өгүүлбэр цээжилснээр сурдаггүй гагцхүү тухайн хэлний зүйг, ялангуяа үйл үгийн цагуудыг нухацтай ойлгож байж суурьтай сурдаг, өөрөөр хэлбэл ойлгосноо зөв хэрэглэж байж сайн сурдаг гэдгийг онцолж дурдмаар байна. Энэ сурах бичигтээ англи хэлний үйл үгийн цаг бүрийг тайлбарлан жишээлж дасгал ажлаар бататгасан бөгөөд номын эхэнд нэр үгийн ганц, олон тоо номын төгсгөлд дасгалуудын хариу, дүрэм бус үйл үгийн жагсаалтыг оруулсан. Тэрчлэн цагуудаа ойлгож дасгалуудаа ажиллахын зэрэгцээ дүрэм яриа хоёрыг зөв хослуулаасай гэсэн үүднээс яриа өрнүүлэхэд дөхөм болгож ярианы асуултуудыг багтаалаа. Энэ номыг бичихэд урам зориг өгч, бүх талаар тусалсан хайрт хань Д. Ариунбатдаа их баярлаж байгаагаа хэлье. Мөн миний багш ХБНГУ- ын Карлсрүэ хотын Багшийн Дээд Сургуулийн Англи хэлний тэнхмийн багш, доктор Виржини Тайхман, доктор Улрике   Алтэндорф,   Карлсрүэгийн   Их   Сургуулийн   Хэлний Төвийн англи хэлний багш Жонатан Кларк нарт гүн талархлаа илэрхийлье.