Номын тухай

Их Монгол улсын үед Өмнөд, Хойд Хятадыг нэгтгэж, нэгэн улс хожим бий болох суурийг тавьсныг, Алтан Ордын нөлөөгөөр Москвагийн эзэнт улс хүчирхэгжсээр Их Орос орон болон хувирсныг, Их Монголын эзэнт гүрэн дэлхийн хамгийн том чөлөөт худалдааны бүсийг үүсгэсэн гээд өмнө нь дуулаагүй олон шинэ сонин мэдээлэл бичигдэх болжээ. Монголчууд дэлхийн цэргийн урлагийн түүхэнд онцгой хуудас бүтээснээс гадна олон зуун жилийн турш Ази, Европт мөрдөн дагаж ирсэн төрт ёсны уламжлалыг бий болгож, Дундад Ази, Энэтхэгийн хойгт урлаг, соёлын гайхамшигт дурсгалуудыг үлдээж, дөрөө, дипломат халдашгүй эрх гээд олон зүйлсийг хүн төрөлхтний өвд хандивлажээ. Бидэнд болсон бодит үйл явдлыг өөрөөр ойлгуулсан, ач холбогдлыг нь бууруулсан, мушгин гуйвуулсан, мартуулсан, гөрдөн гүтгэсэн гээд түүхийн олон хуудас өдгөө ил болжээ.