Номын тухай

Газар шороо романы эхний хоёр дэвтэрт харийн хааны "сүрэгчин" гэгдэж явсан Монголын нэгэн хошууны хүн ардын аж байдлыг манжийн дарангуй төр унах босгонд тулж ирсэн түүхэн зангилгаа үйл явдлын дэвсгэр дээр бусад олон хэрэг явдлын сүлжээн дунд уран сайхны дүрээр дүрслэн үзүүлсэн байна. Өнөөдрийн аз жаргалын амт шимт, маргаашийн нарны гэгээ гэрлийг бүрэн мэдэрч, төгс ойлгоход өнгөрсөн үе хойч үед их тус болдог нь нэгэнт шалгагдсан үнэн билээ. Залуу үе маань Эх орныхоо өнгөрсөн үеийг улам цараатай гүн мэдээсэй. Бид ам бүл цөөн ч том түүхтэй агаад олон баатар амиа өгч тэмцэж тогтоосон ГАЗАР ШОРООН дээрээ аугаа их түүхийг бүтээх ард түмнийхээ залгамж хойч үе шүү гэдэг язгуур нэгэн санааг зохиогч энэ романаараа дамжуулан хэлсэн юм.