Номын тухай

Шинэ урлагт зохиомжийн чөлөөт шийдэлт, өнгүүдийн харилцан зохицол, элдэв хэлбэрийг найруулан зохиомжилж хөгжимсөг яруу уран бүтээл туурвих хандлага түгээмэл дэлгэрчээ. Энэ урлаг нь гоо сайхны нэгэн өвөрмөц хэв маяг болж улмаар хүмүүсийн оюун санааны амьдралын хэрэгцээ болж байгаагаараа онцлог юм. Зураач, багш Ж.Төмөрбат "Зохиомж өнгө, хэлбэр гоо сайхан" гэсэн номоороо зохиомжийн онол, аргад тулгуурлан өнгө, хэлбэрээр сэтгэлгээний зураг бүтээж хүмүүсийн дотоод ертөнцийг өдөөн сэрээхийн зэрэгцээгээр "цэвэр" зохиомжийг ойлгоход дөхөм болгож шүлэг, аялгуугаар хийсэн тайлалаа тусган харуулжээ. Зохиомж-утга санаа-гоо сайхан бүлэгт багш, оюутны бүтээсэн хийсвэр зохиомжийн ажлуудаар бүрдсэн сонин шийдэлтэй ажлуудыг багтаажээ. Мөн "өнгө өнгийн зохицол" бүлэгт өнгийг гоо сайхны талаас зохицуулах боломжийг авч үзсэн байна.