Номын тухай

ХУЛАН БИД ХОЁР

Шар Цамба гэгч гуч эргэм настай, ирвэснийх шиг жоот-гор шар нүдтэй, буржгар хүрэн үстэй, дундуураа ховилт-сон урт эрүүтэй бөгөөд майгавтар богинохон хөлөөбат гишгиж, нударгаа үргэлж зангидаж явдаг хүн. Шар нүд нь урин зөөлөн харцтай байхыг би ер үзээгүй. Нусгай жаалууд бол түүний харцнаас айж хулганан, мөрөөхавчиж, модон өмд өмссөн юм шиг хөдлөхгүй болно. Цамба адуу мал, алт мөнгөөр баян бөгөөд морь арилжих дон туссан хүн. Хавар ногоо цухуйнгуут хэдэн морь хэлхэж, сайн эмээл тохож сайхан хувцас өмсөөд л хуй салхи мэт арилж өгнө. Тэгээд Хэрлэн, Баян-Улаан, Гал шар, эсвэл бүр Дариганга хүртэл доншуучлаад ид зун болсон хойно сайн сайн морьдыг хатирч жороо, өнгө зүсээр нь ижилсүүлж хөтлөөд, уулын бэлээр тоос татуулж уртын дуу уянгалуулсаар буцаж ирнэ. Шар Цамбын ид хав ийм л байлаа. Манай нутгийнхны зарим нь түүнийг цагаан омогтой, хийморьтой, сайн эр гэх боловч олонхи нь онгиргон сагсуу, олиггүй хүн гэлцдэг билээ.