Номын тухай

"Нууц цэцэрлэг" зохиол нь санаанд оромгүй өрнөл ба тайлагдашгүй нууцаар дүүрэн ном юм. Арван настай Мэри Леннокс хайр гэж юу байдгийг хэзээ ч мэдэрч үзээгүй өссөн билээ. Эцэг эхийг нь өөд болсны дараа түүнийг дундад зууны бөглүү эдлэнд амьдардаг холын хамаатных руу нь явуулжээ. Тэнд аварга том байшингийн олон өрөө үргэлж хаалттай байдаг байлаа. Гэтэл охин шөнө дунд хүн уйлахыг сонсов. Бас тэрхүү эдлэнд арван жил хэн ч хөл тавиагүй нэгэн цэцэрлэг байдгийг санаандгүй олж мэджээ. Эдлэнгийн эзэн цэцэрлэгийн хаалгыг цоожилж, түлхүүрийг нь газарт булсан байна. Дүнсгэр эдлэн хамаг нууцаа аяндаа дэлгэхийн цагт бяцхан охин харин хайр энэрэл, эелдэг сайхан бүхэнд зүрх сэтгэлээ эрхгүй нээсэн юм.