Номын тухай

Жон Гришам бол гайхамшигтай авьяастан бөгөөд үхлийн аюултай, эрсдэлтэй, ээдрээт үйл явдлуудыг сэтгэл татам сонирхолтой уран зохиол болгон хувиргах ховорхон чадвартай зохиолч юм. Түүний зохиол бүтээлүүдийн гол баатар нь өмгөөлөгч, шүүгчид болон хууль шүүхийнхний алдаанаас болж хохирсон хүмүүс, хэрэг зөрчил гаргагчид зэрэг хэзээний танил хүмүүс байгаад зогсохгүй уншигчид тэдний төлөө өөрийн ах дүү, төрөл садан, ойр дотнын хүмүүсийн адил сэтгэл түгшин зовдог. Чухам тийм учраас л түүний зохиолууд хамгийн эрэлттэй номуудын жагсаалтыг тэргүүлж, дэлхийн 40 гаруй улсын хэлээр орчуулагджээ. 

Принстоны Их сургуулийн номын санд хулгай оржээ! Фрэнсис Скотт Фицжеральдын асар үнэтэй гар бичмэл алдагдав. Цагдаа нар, ХМТ-ныхон яаж ч чадахгүй мухардахад даатгалын хувийн компанийнхны хөлсөлсөн, алдагдсан урлагийн бүтээл эрж олох чиглэлээр мэргэшсэн хувийн мөрдөх товчооны ажилтнууд тус хэргийн хойноос хөөцөлдөж эхэлнэ. Алдагдсан гар бичмэлийн ул мөр Флоридагийн эрэгт байдаг амралт сувиллын арал Камино руу хөтөлнө. Учир битүүлэг гэмт хэрэгтнийг олж илрүүлж чадах болов уу?..