Номын тухай

Төгөлдөр хуур бол бусад хөгжмийн зэмсэг дотроос хамгийн яруу төгс, боловсронгуй бүтэц, хэлбэртэй хөгжмийн зэмсгийн нэг юм. Ялангуяа хөгжимдөх ур зүйн ухаанд эхлэн суралцагсад энэ хөгжим дээр дасгалжин суралцахад тохиромжтой бөгөөд ямар ч аялгуу эгшгийг гоцлон хөгжимдөх бүрэн бололцоотой байдаг. Энэ хөгжмийн зэмсгээр хөгжимдөх арга барилыг мэргэжлийн хөгжмийн сургуулиудаар олгодог байсан бол одоо гүнзгийрүүлсэн сургалтаар, сургалтын төв, хөгжмийн дугуйлангууд зэрэг өмчийн янз бүрийн хэлбэрийн сургалтаар эзэмших бүрэн боломжтой болжээ. Ийнхүү хөгжим сонирхогчдын эрэлт хэрэгцээ, сонирхолыг харгалзан та бүхний сэтгэлийг хөглөж, хөгжимдөж сурах үйлсэд тань бага боловч тус нэмэр болох үүднээс төгөлдөр хуур эхлэн суралцагсад болон хөгжим сонирхогчдод зориулж энэхүү "Төгөлдөр хуур" сурах бичгийг толилуулж байна.