Номын тухай

Хорвоо ертөнц гайхамшигаар дүүрэн аж. Нууцлаг, учир битүүлэг бүхнийг таньж мэдэх жолоогүй хүсэлдээ хөтлөгдөн , сэтгэлийнхээ мяндсан хөвчийг чагнаж, бодлынхоо оёоргүй холхид тэнүүчилж, Тэнгэрийн торгон үүдэнд туугдаж, Газрын гарцгүй үнэнд гүйцэгдэж яьаа нэгэн  би бээр "Оршихуйн зургаан тив"  судрыг дэлгэн суугаа танд " Амьд явбал алтан аяганаас рашаан амсдаг" хэмээх ардын мэргэн үгийг мянгантаа сануулан энэ судрыг өргөн барьж байна. Үлгэр домогт итгэхээ байж, өвгөд дээдэстээ сүсэглэхээ больж, төөрөг заяандаа төөрөн үнэнтэй үл эвлэрэ, худалтай илт сүжрэн амьдарч буй бидний олонхийн хувьд билгийн амьдрал,  далд ертөнцийн тухай ойлголт " Шинжлэх ухаан" -ы шинэ салбар, гүн ухааны гаж урсгал гэгдэхүйц алс бөглүүд ухагдахуун болжээ. Оршихуйн эздийн судрыг тосон авах Тэнгэр Эцгийн зарлиг Дэмчийн бүлд ирсний дагуу тив тивийн эзэд өөрсдийн биеэр өргөөнд минь заларч, Дэлхийн дотоод цөмөөс эхлэн Огторгуйн зах хязгааргүй мандалд орчих Зургаан тивийн бүтэц бүрэлдэхүүн, зохион байгуулалт, үүрэг хариуцлагын талаар тодорхой айлдаж өгсөн билээ.