Номын тухай

Зохиолч Ж.Амгаланбаатарын “НҮЦГЭН ҮНЭН” роман хэвлэгдэн гарлаа. Жанчхүү орчмын жижиг тосгонд амьдардаг Хун хуа бүсгүй тарчиг ядуу амьдралын зүдгүүрт бэрхшээл, хойд эцгийн дарамт гачаалаас дайжуулж, “газрын диваажин” Ар монгол руу арваадхан настай бяцхан хүү Жан Цань Минийг үднэ. Хожмоо Элбэг-Амгалант гацааны толгой данжаад нарын нэг болон өсч өндийсөн Шаазгай данжаад Маймаачингийн “данжаад нарын зөвлөл”-өөс гаргасан бодлого, шийдвэрээс ангид байж, суртал номлолд үл эвлэрч, хэдий цагаачилж ирсэн боловч, энэхэн амьдралынхаа ихэнх хугацааг өнгөрүүлсэн, цаашид насан эцэс болтлоо амьдрах, хятад угсаатнуудын хэдийнээс шунаж, улайрч, цуурч ирсэн ар монголын ариун дагшин газар нутаг, цэлмэг хөх тэнгэр, ууч, тусч сэтгэлт монгол зонд буруу санаж явахаасаа илүү харин ч хүн шиг амьдарч яваагийнхаа ач буянг энэ бүгдтэй холбон, сүжирч, бишрэн, хичээн амьдарч буй тухай өгүүлнэ. “Муугийн уршиг олонд, могойн цус тэнгэрт” гэгчээр муу хүний хатгаасаар зовлонт амьдралыг туулах Зодовын ээдрээт амьдрал, зах зээлийн нийгмийн шилжилтийн үеийн золиос болсон нэгэн үеийн төлөөлөл Амарбаярын ухаарлын түүх, эх орны тусгаар тогтнолын үнэн түүх, социалист нам төрийн бодлогын алдаа, хэдэн арван мянган жилийн турш хаяа дэрлэн оршин буй айл хөрш орны жирийн иргэдийн аж төрөл, хувь зохиол, заяа төөрөг хэрхэн өрнөж, өөр хоорондоо яаж шуухан сүлэлдэж буйг уншигч та энэхүү номноос унших болно. Чухамхүү хуудуугүй үнэнг нүцгэнээр нь, жинхэнэ нүүр царайгаар нь үзүүлэхэд “НҮЦГЭН ҮНЭН” номын зорилго чиглэгджээ.