Номын тухай

Үл таних тэр нэгэн хүн хоёрдугаар сарын эхээр анх ирсэн юм. Жавартай хүйтэн тэр өдөр салхи  исгэрч, энэ жилийн сүүлчийн цасан шуурга нүүр  нүдгүй шавхуурдаж байв. Тийм байтал мань хүн төмөр замын Брэмбхерст өртөөнөөс явган иржээ. Зузаан бээлийтэй гартаа хар өнгийн, жижигхэн, даргар хатуу цүнх барьсан харагдана. Хөлөөс толгой хүртэл битүү хувцаслаж, биеэ сайтар далдалжээ. Ноосон бүрх малгайн өргөн хүрээ доош унжин нүүрийг тэр чигээр нь халхлаад, зөвхөн хамрын гялалзсан үзүүр харагдана. Мөр, цээж нь цүнхний адил цасанд дарагдсан байна. Тэр хүн даарч, ядарсандаа хөлөө арай ядан чирсээр <<Хөтөч ба морьд>> буурчийн газрын хаалгаар орж ирэнгүүт даргар хатуу цүнхээ шалан дээр тасхийтэл чулуудав.