Номын тухай

Монгол Улс тулгамдсан асуудлаар дүүрэн, түүнд бухимдаж, бас гомдсон хүмүүсээр мөн хальж байна. Эерэг талаас нь харвал улс маань хөгжиж байгаа залуу орон болохоор тэр. Тулгамдсан асуудлыг олон талаас нь өнгө нэмж, хүч түрж нийгмээрээ ярьж шүүмжлээд шийдэгдэхгүй. Тиймээс асуудал бэрхшээлд түүнээс гарах гарц, боломж талаас нь хандах сэтгэлгээ чухал байна. Асуудал бүр шинэ боломжийг үүсгэнэ. Гарц байж таарна. Гагцхүү түүнийг олж харах, түүгээрээ "гарах" нь өнөөгийн шаардлага. Товчоор хэлбэл, эх орон маань асуудал, бас боломжоор дүүрэн байгаа гэсэн үг.
Хэрэв та бид нийгмийн асуудал нь нэгэнт шийдэгдчихсэн хөгжингүй оронд төрсөн байсансан бол, нэгэн хэвийн амьдралд дасаж "өнгөрөх" хувь тавилантай байх байсан биш үү. Харин ч эх орныхоо хөгжлийн шийдвэрлэх цаг үед амьдарч, хамт алдаж бас онож яваа нь бидэнд өөрөө сорилт болж байгаа сайн хэрэг. Харин энэ сорилтыг давж гарах эсэх нь анхаарах ёстой гол асуудал. Хүн бүр өнгөрсөн, өнөөгийн асуудалтайгаа богино зайд зууралдаж, улсаараа урагш тэмүүлэх хүсэл мөрөөдөл бас нэгдсэн зорилгогүй болчихвол хэрхэх вэ. Асуудлын гол нь уг асуудалдаа биш харин тухайн асуудлыг харах бидний сөрөг хандлага, сэтгэлгээнд бий. Үүнийгээ өөрчлөх цаг үеийн шаардлага нэгэнт тулгарчээ. Зохиогч