Номын тухай

Шөнө нойрон дунд нь Доржийн дуу сонстоход Янжиндулам орон дээрээ босож сууснаа хурдхан хувцсаа өмсөв. Оройн сүү хөөрүүлчихээд Доржийг ирж магад гэж бодоод чанаж тавьсан хонины өвчүүгээ жаал бүсгүй санав. Дорж хэмээгч тавь эргэм насны махлаг зузаан эр хонины өвчүү идэх дуртай тул Янжиндулам өчигдөр муулсан хонины өвчүү зориуд чанажээ. Зуны шөнийн том тэргэл саран орчныг гэрэлтүүлж, тэр гэрлийн дор морьтой хүний бараа тодрон, хар морины амьсгаа сонстож товор товор алхаа ойртон, ойн цагдаагийн том цагаан гэрийн өмнөх уяан дээр ирж зогсоход ирсэн зочинтой хэдийнээ танил болсон том биетэй халтар нохой хэд хуцсан болоод шөнийн нойроо харамлав бололтой цавиндаа хошуугаа шаан хэвтээд өгөв. Дорж дотогшоо орж, Янжиндулам урам муутайхан морь уруу алхав...