Номын тухай

Хүн оршин тогтнохуйн үндэс язгуур нь удам судар мөн. Миний бие унасан газар, угаасан ус, унаган төрөлх Алтай нутаг, удмаараа бахархан хууч хөөрөх сайхан буурлуудын дунд өсөж торнин хүний зэрэгт хүрсэн билээ. Өвгөд, дээдсийнхээ эрт эдүгээгийн түүхийн жимээр аялахдаа Монгол эх орноороо бахархах омогшил төрөөд зогсохгүй удам угсаа, гарвалийнхаа тухай, унаган нутаг уул усны нь тухай багавтар бүтээл туурвих юмсан гэсэн бодол төрснийг энэ цаг мөчид биелүүлж, энэ номыг туурвиж байгаадаа баяртай байна. Өвөр дээр нь өссөн өвөөгийнхөө гэгээн дурсгалд зориулан номоо туурвисан учир "Миний өвөө Пунцагийн Жасрай" хэмээн нэр хайрлаж, өлгийдөв. Монгол хүн бүр удам угсаагаа ариун байлгахын төлөө, удмын нэр төрийг өндөрт өргөж явахын төлөө хичээгээсэй хэмээн хүсэхийн ялдамд өвгөд, дээдсийнхээ гэгээн дурсгалыг хүндэтгэн номон суварга босгож, өнөө болон хойч ирээдүйн үр садынхаа оюуны санд нэгэн дусал нэмж, сэтгэлийг нь ариутган баярлуулахыг хичээлээ.