Номын тухай

Мянганы турш нүүдэллэн амьдарч явсан монголчууд иргэншин суурьших, коммунизм байгуулах хоёр давхацсан юм. Улс орны амьдралд гарсан дэвшил, хувь хүний аж төрөл, боловсролын үсрэлт нь социализмын жилүүдтэй холбогддог. Ийм учраас иргэншсэн ертөнцийн анхны боловсрол, мэдлэг нь өнгөрсөн үеийн тогтоцтойгоо маш бөх уяатай.
Гэвч шинэ үзэгдэл, юмсыг маш сайн өөриймшүүлдэг зан нь Монголчуудыг даяаршин буй дэлхий ертөнцийн нэг хэсэг болгон хөтөлж яваа юм.
Монголчууд яагаад эвлэлдэн нэгдэх туршлагаар дутах болов. Аливаа хөтөлбөрийг зогсоох, бүтээн байгуулалтыг нураах тал дээр гар нийлэн амжилт олдог атлаа хамтаараа бүтээх, нийлж ашиг олох гэхээр бөөн зөрчил тэмцэлд автан гацдаг учир хаана байна!
Нийтлэг ашиг сонирхлоо тодорхойлон нэгдэх чадвар дутмаг байтлаа улс гүрэн нь яагаад мөхөөгүй юм бол? Их хөршүүддээ уусчихалгүй өнөөг хүрч, тусгаар тогтнож, ардчилсан нийгэм байгуулж яваагийн нууцыг та энэ номоос унших болно.
Уг номонд 240 гаруй өнгөт болон хар цагаан зураг, амархан тогтоогдож, ой санамжинд үлдэх зохиомж, сэдэв бүрийг бататгах баримтууд, баримжаа өгөхүйц он дарааллын хроникууд, энгийн ойлгомжтой бичлэг, дүрслэлүүд орсон болно.