Номын тухай

Номын зохиогч Л.Цэрэнбумаа Буддын гүн ухааны сургаал номлолыг насан туршийн итгэл үнэмшил, сэтгэл бишрэл, хичээл зүтгэлээр шимтэн судалж, сурсан мэдсэнээ хүн байгалийн сайн сайхны төлөө зориулах эрхэм үүргээ туйлын үнэнчээр гүйцэлдүүлж явсан аавынхаа хааяахан ам нээж ярьсан дурсамж, сургаал, ахмад хүмүүсийн дурдатгал, аавтай нь уулзаж учирч байсан амьд гэрчүүдийн хууч яриа, өөрийн үзсэн харсан, сонссоноо эмхлэн цэгцэлж энэхүү дурсамжийн номыг танд толилуулж байна. Түүний аав шашин ном ид цэцэглэж байсан XX зууны эхэн үед бяцхан тархиндаа шашны гүн ухааны үр суулгаж, 14 насандаа Гандандаржаалийн хийдээсээ оргон Богдын хүрээг зорьж, буддын гүн ухаанд тасралтгүй гуч гаруй жил суралцан, улмаар гавжийн дамжаа барьсан бурханы үнэнч мэрийлттэй, хичээнгүй шавь байжээ.