Номын тухай

Үлгэрийн нэгэн хотод тожгорууд амьдарч байжээ. Тэд маш жижиг тул ингэж нэрлэгдэх болжээ. Тэд жижигхэн өргөст хэмхийн төдий аж. Тожгоруудын хот тун ч сайхан. Байшингуудыг тойрон хонин нүдэн цэцэг, балжингарам, багваахай цэцэгс алаглана. Гудамж нь Хонхон цэцгийн, Балжингарамын, Хонгорзулын цэцэрлэг гэх мэтийн нэртэй. Иймээс ч Цэцэгт хот гэж алдаршжээ. Цэцэгт хот горхийн эрэг дээр оршино. Эрэг даган өргөст хэмх элбэг ургах тул тожгорууд Өргөст хэмхийн горхи гэж нэрлэжээ. Голын тэртээ ой байх агаад тожгорууд хус модны холтсоор завь хийж, голыг гатлан, тэндээс самар, мөөг, жимс түүнэ. Тожгорууд тун жижигхэн болохоор тэдэнд жимс түүх тийм ч амаргүй. Самар унагахын тулд өндөр бут өөд хөрөө үүрэн авирах хэрэг гарна. Тэдний хэн нь ч боргоцойг гараараа тасалж дийлдэггүй учир ийнхүү хөрөөднө. Мөөгийг ч бас хөрөөднө. Эхлээд угаар нь, дараа нь хэсэгчлэн хөрөөдөөд гэртээ зөөж авчирна. Тожгорууд нэг янз биш, тэдний дотор охид ч бий, хөвгүүд ч бий...